Tasɣunt n Tadelsa n Arrif, tettas-d ḥma ad tili d ict tnewwact tettwaẓẓu deg yiger n tsekla Tamaziɣt di Arrif, jarktar, amec nessen, ila ticli n tsekla Tamaziɣt tebda teggur cwayt ɣer zzat, aked wami i d-tettban ijjen tasalt d tamaynut n iḥudriyen d tḥudriyin i yebdan ttqasan tira s Tmaziɣt, ssuffuɣen-d idlisen, fessren iḍrisen-nnsen. Aked uɣezdis n manaya, imaruten d izlawiyen, tili tteḥwajan ijjen yiger mani zemmren ad dag-s mmelqan, ad lellcent tira-nnsen dag-s, d manaya i tettxes ad tegg tasɣunt n Tadelsa n Arrif.
Deg usurif amezwaru di tecli-nneɣ, nbedda-d s wudem n «PDF», zemmren marra iwdan i yettxsen ad ɣren Tmaziɣt, ad tt-id-ssehwan, maca d asitem ɛawed, asenfar-a nneɣ/nwem ad yemɣer ɣer wudmawen nneḍni, ataɣ ijjen wass ad yili d tawriqt jar ifassen-nnwem.
Tadelsa n Arrif, d iger mani ttemsagaren ayt bab n tira s Tmaziɣt, mani tzemmer ad tili ɛawed d ijjen yiger mani ɣa mbuddulen imaruten d izlawiyen ixarrisen, merra manaya yettɛawan ɣer tyumi n tira, ɣer tyumi n usewlef d tewlafin, ittejja mayen nettari ɛawed, yettwazemmam, akid-s ɛawed, ad yemsar ijjen usuɣel d usedwel zeg yeḍrisen imaḍlanen ɣer iles n Tmaziɣt, tabridt-a, tettejja ameɣri Arifi ittsajja x ca zeg wudmawen n tsekla Tamaḍlant, mamec ittejja amara amaziɣ, ɛawed, izemmer ad issij x mayen yettwarun, ad yessemɣer la d netta zi lxezrat-nnes ɣer umaḍal. Yina zi drus n iwettasen i d-neydar danita, maca awettas ameqqran yettɣima d asemɣer d usgeɛɛed zeg wazal n tira n Tmaziɣt.
Γer umeggaru, asitem-nneɣ zi merra izlawiyen d imaruten s Tmaziɣt n Arrif, ad kid-neɣ ggen fus-nnsen, ad d-sekken tira-nnsen, d uxarres-nnes d tannayin-nnes, minzi Tadelsa n Arrif d ict tesɣunt treẓẓem tawwurt-nnes i merra wen di yella wemnus n Tmaziɣt d tira-nnes, nettkemmal s uwenni i yeqqaren wenn ittexsen Tmaziɣt, ad yessen tira-nnes.
