Uyac tuɣa neqqim xef tma n yilel, ntarra mezri, ntales tinfas tiquḍaḍin i wayawya, qa war d narri taynit i tudart d ifilan nnes, niɣ ṣafi tettud? tettud ussan inderyen xef wenḍṛaṛ n uɛetman iwalan idurar n imɛellaten, mayemmi tettud? mayemmi tejjid aṣemmiḍ issilyam ibeḥrar? tejjid arrimet nnem ssijjen xafes imedrar? mayemmi?.
Mayemmi, tuɛaṛ twarrit nnes, qa neqqeɣ da ixef inu waha xef tefray, cem ma d ict i tettud? Tettud ula d ass nneɣ ameqqran, imran jar aneɣ deg wnebdu di negga amsagar amezwaru, umi d xafneɣ tender tallest sadu tseklut i d yusin zzat i temzida n waman, tiwa i yefri n ibaṛbiɛen, tɛeqled? tuɣa cem deg yict n tnawwat d tazzdat, tneqq itt tismin zi termect nnem. Aked wendar n tallest, tehwa d ca n ddeg n teṣmed d acemmuḍ, necc war ɣari mɣar irem ad cem zzayes dleɣ, cem teṭṭfed dayi, tnuffured, ttefruruyed, ttlaɣid s tniɣt nnem taleqqaɣt amen teɣḍeṣ di tarjijit: «buḥbel inu ...».
Lexxu mani tellid? manis tekkid? mayemmi cem iweḍḍaṛ useynu? mayemmi tejjid addriwen ad ẓẓuyten imsagaren nneɣ? mayemmi war txaṛṛṣed di tɣimitin i negga xef tessfay d isqadan leɛwin ifsus, ikessi tnawwat xef tfaddin nnem ikessin ifadden. aqqa ɛad lefwaḥ nnem itemraywa xef tmawin iɣeẓṛan yugnun, din i t tejjid, aked tiwalin nnem isruɣan timessi taṣemmaḍt deg wulawen.
