Yemma texleq aṛebεa niɣ xemsa n iseggwusa qbel i wezyen n lqarn nni yeεdun, ca n twalatin tessawal aneɣ xef lḥarb i yemsaren jar aneɣ aked iṛumeyyen. Nettat ur teεqil ca xef ca n wemjahed, kulci iffeɣ as lbal, yalleh mamec tuɣa d taṛẓem tiṭṭawin, tεawed aneɣ xef min das yenna babas. Netta yeffeɣ ɣar lɣabet ḥuma ad issufeɣ leεdu,deg wexlaq n yemma, ameḥḥen yettban xef iɣembab n yewdan, war yelli wenn yeccin yejjiwen, tajemmiεt n lɣaci ttnezlafen qaε. Am neccin am yinneɣni, mala necca ɣar ṣṣbeḥ ur ntett ar tameddit. Amecli nneɣ d amensi.
Ma d amecli ma d amensi, ijj zzaysen i ɣarek lḥeqq? Aɣrum acemlal ur t nessin qaε, imeḥḥen aneɣ haca aɣrum abarcan. Aɣrum i d yetwazedmen aked ubelluḍ (rbedjuḍ), d yinni itetten ilfan di leɣwabi, war din bu lfarq jar aneɣ, iεdawen nneɣ ssemquddan aneɣ ɣarsen am rmar i yteddaren di leɣwabi.
Lmizareyya taṛeṣṣa deg walli nneɣ, teṭṭef dayes i lebda, iεeddisen nneɣ, εemmars ma jjiwnen mamec xsen, war yelli wenn issenjem umeḥḥen, war yelli wenn issenjem laẓ, d lesbab i yejjin iwdan n tmurt a uεaren. Mamec tegga tmexsa ɣa yilin mala izellifen d iεeddisen xwan? d lmuḥal! am yemma am twacunt nnes, am imezdaɣ n taddart maṛṛa, d tenni i d aneɣ d ttḥaja yemma, babas d yemmas am nitni am rmar, ɣar awal i ten ifarqen aked cwayt n leεqel, εlaḥal war din bu lfarq jar asen. Γar alli i daysen yeqqimen, yeccur izellifen nsen. Laẓ, aṣemmiḍ, iḍeṣ walu, lxedmet ur ten tejji ura ad xemmemen ɣar ḥedd nniḍen. Ur ssinen ca min yuɣin yinniḍen, ḥaca ad arzun ad xedmen ḥuma ad d awyen min ɣa ccen. Iεeddisen lluẓen, izellifen xwan ur zmiren ula ad xemmemen ɣir min ɣa yemsaren ass a niɣ tiwecca, tanya ula d tiwecca nni wi yessnen ...
----------------
Asedwel s Ubeddi n Mass. Jawad Zzubeɛ
(1) D ungal d aqbayli, n umaru Ɛli Kader, Aḍṛiṣ anaɣizan, tasna.11
){kind=link}