G unebdu n 2006, nemmuti-dd zeg Isaggen ɣer Tiṭṭawin. Awarn i tmettant n baba yameqqran, baba yezzenz ict n tqiraṭ, yufa wer yelli min ɣa yegg di ddcar, yerni min ɣer-s ɣer min illan ɣer yemma, minzi ula d nettat wcin-as ayetma-s tasɣart-nnes zi taddart n Act Sԑid, isɣa yict n taddart d ijj n uṭakṣi ikessi dag-s iwdan ɣer Bab Sebta, azgen ameqqran zeg iwdan nni i tuɣa ikessi d timɣarin. Deg ijj n wass, inna-yas i yemma :
- Maɣar wer tettnekkired ula d ccem ad twawrid cwayt, timɣarin suct lallam ggin-t umi qqaren agla.
Tesḥess ɣer wawal-nnes yemma, tessenta ula d nettat tettadef ɣer Sebta, tettawi-dd ṭṛabandu, ttԑawad-as azenzi i tḥuna. Deg ict n tuffut, tugur ɣer twuri, qqimeɣ necc di taddart, tuɣa ɣer-i ṣḍiṣ n iseggʷasen, cwayt ttesliɣ i wesqerqeb, reẓmeɣ, ufiɣ d baba i dd-idewlen, nniɣ as :
- Baba mayemmi i dd tusid ruxa?.
- Inna-ayi: wer dinn min ɣa ggeɣ baṛṛa, as- dd qqim ɣer uɣezdis inu a yelli.
Kkreɣ qqimeɣ as deg uḥsin, netta issruf-ayi i wcewwaf, ar mani ufiɣ isseẓẓl-ayi x mṭaṛba, issehwa-ayi aserwal, ikkes aṛṛuḍ-nnes, uca yehwa-dd xaf-i, necc amen lliɣ d tameẓẓyant wer ssineɣ min itteg, ibbar dag-i manayenni nnes ar mani d ayi isḍuqqeẓ, uca ikker, inna-ayi:
- Kker a yelli ruxa ad tesliled, maca qa mala terr-dd yemmam lexbar, ad am ssekkeɣ taxedmit x yili.
Snuffreɣ min imsaren, wer zmireɣ ad tt-iniɣ i yemma, wer ssineɣ ma ja ggʷdeɣ, niɣ iԑejb-ay lḥal. Zeg wass nni, tuɣa melmi ma taddart aqa-tt texwa ittas-dd ɣer-i, manayenni nnes d ameqqran aṭṭaṣ, maca waxxa yamenni tuɣa takiɣ s teẓyuḍi.
Ict n twalat, di tsedlist n usinan nneɣ tuɣa qqimeɣ ag uselmad n umezgun, wer ukiɣ ar mani ufiɣ ttԑawadeɣ as min d-ayi yemsaren, ja ttwaliɣ dag-s netta izemmer ad ayi yaf ca n ufsay i umxumbel-a, iffeɣ rid amenni, wami ig issen ila necc nnuqbeɣ ja yrezzu ad kidi yeṭṭeṣ, maca wer d-as yufi mamek minzi netta yemlek. Aseggʷas nni tuɣa-t d ameggaru i ɣer-i g usinan, awarn-as mmutiɣ ɣer tesdawit n Ԑbd Lmalek Sseԑdi.
Am maṛṛa tiwetmin, ijj n wass tuɣa ttteffɣe-dd zi tesdawit, iḍefṛ-ayi yijjen ar taddart-nneɣ, tuɣa yrezzu ad kid-i yessiwel, ssiɣeɣ-as uṭṭun inu, nessent-a nettemṣawaḍ jer-aneɣ, ar mani nessen aya d uya mliḥ, itter zzag-i ad iniɣ i twacunt inu ila gguren-dd inexḍaben, waxxa ԑemmaṛṣ ma nemsagar maca udfeɣ-as lxaḍar. Udfeɣ ɣer yemma ɣer uxxam, nniɣ as:
- Yemma, tiwecca ad asen ca n yewdan ad xeḍben.
Terr-dd nettat :
- mliḥ a yelli, ssitimeɣ-am ad telqid mɣar min illan d aṣebḥan.
- Maca a yemma dinn ijj n umxumbel! I d-as nniɣ.
- Min iԑna a yelli? Tesseqsa.
Tasdawit teslemd-ayi cwayt n zzɛamet, wer illi ameknaw temẓi, nniɣ-as maṛṛa min illan, d min imsaren ag baba, aẓaẓa nni i zi tuɣa ttakiɣ mṛaw d kṛaḍ n yiseggʷasen zeg wami, assa sserseɣ-tid ɣer tmurt, a xmi i tuɣa ttmenɣiɣ ag teṣḍaṛt n Sizif, ad taweḍ wer ttiweḍ.
Yemma tigellint wer tuki minzi tettebla, tuɣa-tt tcaca zi baṛṛa, maca tuԑԑefna tekka-as-dd zeg wallaɣ n taddart, min di wer txeṛṛeṣ ԑemmarṣ ad imsar, tenna-ayi:
- Arr x mmis n midden, ini-yas qa wgin, ini-yas qa trezzud ad tessenfarared tiɣuri-nnem.
Rriɣ x uḥenjir nni, ikka ssenni, yemma terri-tt ɣer wul-nnes, teqqim-as d afeqqus.
Necc wer ufiɣ zdat inu mɣar tudrin n tmegganin, rewleɣ-dd zi taddart nneɣ, ufiɣ dag-sent rreḥmet i wer yellin di baba.
Ruxa aqa-ayi tteddreɣ s min dd ttawiɣ s tmeddit, min ttqeccaṛeɣ zeg yenni i xef iԑizz uksum azegza, maca nitni ttifen baba s waṭṭaṣ, minzi nitni ԑemmaṛṣ ma xeṛṛṣen ad ccen aksum n taṛwa-nsen uca ad tt ndaṛen i yiṭan a mux d ayi temsar i necc.
------------
1 - uṭṭun: nnumru, nnemra.
