Wami beddeɣ zzat i teqseft taqburt di teɣremt, sfeldeɣ i ihedawiyen thelhilen zzat ijj n ugraw n yewdan.
Udseɣ ɣar sen, mḥizwareɣ ura d nnec ad sfeldeɣ s taynit ɣar tamawayt nsen.
Unḍen sa (7) n tawaratin i teqseft nni, zi senni ṭṭfen tabridt n weẓru d yusin xef uɣezdis afusi n igudar nnes.
Ikk d cwayt n wakud iwḍen ɣar uraq n tmeḍlin, deg ammas nnes munen ihedawiyen nni xef ijj n usebder (cercueil, lmeḥmel) war yessin ḥedd wey day s itt waneḍlen!.
Maca iheddawiyen nni war bedden ad lami iwḍen ɣar tawrirt isajjan xef tma n teɣlemt, gguren; ɣeryen xef rxezrat inu. Nec ssusmeɣ deg uraq inu, ggiɣ araji d reɛwetc inu!.
Deg akud nni tuɣa war tesliɣ i zhir ula d amussu nsen, axmi marra mmuten.
Ijj zzay sen; yenna yid:
- Mutti senni!.
Kkareɣ d, smuqqleɣ deg usiḍuḍ nni abarcan i yedlin isebder nni (cercueil).
Ɣenseɣ asqar i ixf inu; uca nniɣ as:
- Mayyemmi war d tseqsiɣ ḥedd zzay sen?.
Ijj n uwessar s tamart d tacemlalt, yeqqim zzat inu, sseqsi t:
- Arezzuɣ ad ssneɣ bab n usebder a?.
War xaf i d yarri ca, waxxa sseqsiɣt i waṭṭas n twaratin.
Asusem yesdel xef uraq nni, nnec smuqquleɣ deg usqar nsen, kkareɣ; ssurfeɣ ɣar isebder. Sarweɣ d xaf s acḍaḍ nni abarcan, war day s uffiɣ walu! arenyeɣ sarweɣ t xaf s marra, isijj d xaf i ijj n uzellif yedjef i arrimet nnes, yarwes deg wudem n ca n ijj axmi nni dja zriɣt dey mani!!.
Day i mezri ad ssneɣ bab nnes, maca tajrest n teṣmeḍ tejja yi ad dewreɣ ɣar texxamt inu deg usensu di ggiɣ ad ssenseɣ ict n tmeddit.
Abarru n iseqsiten temxetwayen di tiɣraṣin n wadji inu, mayemmi war tenḍiren, mayemmi ssusmen lɣaci nni, mayemmi xaf sen agwjen ihedawiyen nni?!.
D min day i yejjin aṭṭas ad xarṣeɣ; mayemmi war das qqazen anḍel am imettinen marra?.
Issenta wenẓar itudum d, yeksi cwayt axmi nni war yewti ɛemmars, mmutyen zi lɣaci nni kuz (4) n yargazen xsen ad ksin isebder.
Am weqzin itawi itarra; yarekwwes deg wulli, dfareɣ ten ar lami udffn ɣar ijj n ufakan (temple) isekka s wezṛu d acemlal.. jjin dinni isebder nni uca mkul ijj man tabridt d man n tasellya i yeḍfar. Min tuɣa twariɣ amenni yus d ɣar i axmi d ca n tarja!!.
Udseɣ ɣar isebder, i twarat nniḍen ksiɣ xaf s acḍaḍ zi yedla, d nec tesliɣ i tzut n ca n weqzin yemmuzzar, maca war twiliɣ mani yella, s tigwdi deɣya agwjeɣ xef isebder nni.
Carfeɣ ixf inu ɣar tiracwin n tarja inu, twaliɣ zzat inu akemmar n weqzin nni ɣar s imezzuɣen d imezyanen, tiṭṭawin jeɛɛarent id ɣar i, aɣmuzen nnes qeḍɛen i wenhac.
Agwjeɣ xef uraq nni.. dewleɣ s tazla ɣar usensu...
Maca ɛad war ssiwḍeɣ tabrat i umeddukel inu!..
Deg umeggaru n umsagar nneɣ, yura ayi d tabrat nni, zzat ma ad day i t yewc; yenna yi:
Ddu ɣar temdint n “SAMUC”, traji d zzat i teqseft n teɣremt nnes…
Icarf ayi wakud ɣar s; war uffiɣ ad tessiqsiɣ xef tansa n mani ɣar ssiwḍeɣ tabrat nni!!.
Deg usensu yuza yi yiḍes, qqimeɣ tnuḥmuzeɣ, txarraṣeɣ deg uzellif nni itt waqessen zey arrimet nnes…
Ɣar tuffut, ksiɣ d azeɛbul inu (valise), udffeɣ ɣar ufakan (temple) mani yessens usebder; war senni yemmuti, xzareɣ xef uzelmaḍ d ufusi inu, war twiliɣ ura d ijj…
Kseɣ xaf s acḍaḍ nni, maca uffiɣ azellif nni war dinni yelli. Ijj n uḥarmuc issenta isqarqub; issenxuxur dey tewwart n ufanan, iffeɣ d ɣar s ijj n uwessar, msawalen jar asen s ucemcem umi war ugzuɣ.
Maca ɛini tuɣa itt seqsa t xef bab n uzellif nni?!.
Axmi nni sfldeɣ ɣar uwessar nni, tuɣa yeqqar as s uzawar:
- Azellif nni war d yusi ɣar temdint, ḥima ad tnegg deg isebder…
Ixzar uwessar nni ammu d wammu! Yarjer d d xaf s tawwart nni s ubeqqeḍ d uzunfeḍ.
Ẓwiɣ iked tebridt d yusin xef tma n ufakan, kkiɣ zzat i tudrin isekkn s weẓru war imsarwis deg weẓru n ufakan, iwḍeɣ ɣar teqseft.
Ict n twessart tezri d zzat inu, nniɣ as:
- A ḥenna inu! ɣar i ict n tebrat, yuccel xaf i ad tewceɣ i bab nnes…
War tarri taynit i uraɣi inu, tegga axmi war day i tesri, teṣuref s umari d adaff ɣar ict n texxamt; d yusin xef tma n webrid.
Triɣ ad teḍfareɣ, maca sliɣ i ulehleh n iheddawiyen, bedden zzat inu am iwaffen n tfelwin.
Ḍfareɣ ten, maca deɣya ɣeryen xef rxezrat inu… ssentiɣ steftifeɣ am udarɣal; war twiliɣ min dinni zzat inu!.
Arezmeɣ tiṭṭawin, uffiɣ ixf inu axmi nni lliɣ di ca n tnezruft (sahara) tcefcuf s usezɣel nnes. Ameddukel inu zi ladas yeqqar ayi d:
- “Urjiɣ cek deg ict n tmeddit axmi tuɣa telli d d amezduɣ n tnezruft!.
Di tarja inu tuɣa twaliɣ cek d imweddar, war tessin d ma n tabridt cek d yiwyen ɣar tnezruft, tuɣa tɣuɣud d s ufadi, asutar nnec d ict n tuddimt n waman itt sessi… deg akud nni tuɣa ifadden nnec qarmen xef yejdi.
Twariɣ cek war t zemmar d i tecri, dja dinni kuz (4) n yewdan tezzer ɣar iḍaren nsen ict n arrimet nniḍen, swejjden ad das ɣarrṣen!!.”
