Di min yeεdun, ttuɣa din ijj n tileft, ɣer-s tlata n ixennusen d imeẓẓyanen, tteddren akid-s di taddart.
Ijj n wass, tesmun-iten-dd, uca tenna-sen: «a tarwa-inu, lexxu ḍebbrem x yexf-nwem, aqa wer dawem-zemmreɣ, wer ɣer-i min ɣa teccem».
Tenna-sen: «lexxu merra min ɣa teggem; ruḥem xemmem mani i ɣa tebnam ca n taddart, maca ittxessa-kenniw a das-teggem lemten, ḥuma wer x-awem tt-dd-ittreẓẓi wuccen, a kenniw-yecc!».
Ggin yixennusen llayhennik x yemma-tsen, amen ttrun, uca ruḥen ad rzun mani i ɣa bnan tudrin-nsen.
Ameẓẓyan-nsen yemsagar deg webrid aked yijj n ufellaḥ yeksi-dd alum (rum), uca yenna-s: «εafak mala texsed, wer dayi-tetticced cwayt n ulum a zeg-s bniɣ taddart?».
Yewca-s ufellaḥ-nni min irezzu.
Yemsagar uxennus amelwasu aked yijj n wergaz yezdem-dd ikeccuḍen, uca yenna-s: «εafak mala texsed, ḥdajeɣ cwayt n ikeccuḍen ad bniɣ taddart, wer dayi-tetticced cwayt?».
Yewca-s wergaz-nni ikeccuḍen.
Netta axennus wiss tlata, yemsagar aked yijj n wergaz iεemmer-dd aẓru. yesbedd-it, uca yetter zeg-s a das-yewc cwayt n weẓru ḥuma ad yebna taddart. Amenni nnit, yewca-s wergaz-nni aẓru i zi ɣa yebna ijj n taddart temten, wer yelli wi tt-ɣa ihezzen.
Ttuɣa yeḥḍa-ten-dd wuccen, yejja-ten al umi udfen ɣer tudrin-nsen ad ṭṭsen, uca yenna aked yexf-nnes: «ad bdiɣ zeg uxennus akkuḥ i yeṭṭsen di taddart n ulum».
Iruḥ ɣer-s uca yebda yesqerqub, ittlaɣa: «axennus-inu yecnan, ay axennus yecnan, rẓem-ayi-dd tawwurt» .
Yerra x-as uxennus, yenna-s: «ruḥ rzu manis ɣa-tekked, aqa cekk d uccen, texsed a dayi-tecced. Twessa-yi zeg-k yemma».
Yenna-as wuccen: «aqa mala tugid ad treẓmeḍ, ad ssuḍeɣ x taddart-a uca a tt-sseḍweɣ.»
Yessuff wuccen igemcan, yugem-dd nnefs, yessuḍ s min yeεlam di jjehd, uca yessḍu taddart n uxennus ameẓẓyan.
Yerwel uxennus ggur yesɣuyyu, yesɣata, al umi yufa ixf-nnes di taddart n uma-s amelwasu, i yebna s ukeccuḍ. Yessidef-it, uca bellεen-dd tawwurt.
Iḍefr-iten din wuccen, uca yebda yesqerqub, yeqqar-asen: «ixennusen yecnan, ay ixennusen yecnan, reẓmem-ayi-dd tawwurt».
Rrin-dd x-as zi daxxel: «texsed a daneɣ-tecced? Neccin wer dac-nreẓẓem ca, uca min ɣer-k egg-it.»
Yenna-sen wuccen: «iwa aqa ad suḍeɣ x taddart-a uca a tt-sseḍweɣ».
Yessuff εawed wuccen igemcan, yugem-dd nnefs, uca yessuḍ x taddart n ukeccuḍ, yesseḍw-itt.
Ksin ixennusen taḍwit ggur ttazzlen, sɣatan ɣer uma-tsen ameqqran.
Ireẓm-asen-dd deɣya, yessidef-iten ɣer taddart n weẓru, uca ibelleε tawwurt.
«Lexxu wer ɣer-wem minzi ɣa tegg°dem, ilim tehnam». Ammu i yenna uxennus ameqqran i ayetmas imeẓẓyanen.
Ixecc-dd ɣer-sen wuccen, uca yebda εawed yesqerqub, ittlaɣa: «reẓmem-dd tawwurt ay ixennusen yecnan!».
Rrin-dd x-as zi daxxel: «wer dak-nreẓẓem ca, uca min ɣer-k egg-it!»
Yessuff εawed wuccen igemcan, yessuḍ, εawed yessuḍ, εawed yessuḍ... min yeεlam di jjehd, maca wer yiwiy walu zi taddart i yebnan s weẓru. Temten!
Yekεa wuccen, yezzegzu s tefqeεt. Uca yejjull ḥuma yecca ixennusen-nni.
Yedwel-dd ijj n wass nneɣnit, yeksi-dd akid-s ijj n usellum d azegrar, yuli zeg-s ɣer tẓeqqa n taddart, uca yekka-dd zi bujewwal (cheminée) maḥend ad yadef ɣer daxxel.
Ttuɣa yeqqed din uxennus ameqqran i yijj n tegdurt n waman, nwan mseqqem, ttextuxen !. umi i dd-yehwa wuccen, isur di lwest n tegdurt, uca yeksi s tɣuyyit:
«a yemma-inu kemḍeɣ !... a yemma-inu rɣiɣ !...»
Yedwel manis i dd-yekka, qqimen ixennusen ḍeḥḥken x min yemsaren i wuccen i dd-yusin a ten-yecc. uca zi lexdenni, εemmers ma yeεqeb-dd ɣer-sen.
