Xdem a yaxeddam, xdem a yayujir
Ad tarnid tameddit mara ur d asen iwwiḍ uzir
Tenderfed di raẓ, di ẓreḍ i tewḍid
Isneɣd i cek usraẓi d tamara i teksid
Tdewred d ttaɛejjact ikessi cek usemmiḍ
Ra d ijj ur d ac itselli tesqareḍ niɣ tennid
Mecḥar d tifawin xaf sen ɛad tesruɣid
Cek tzedɣed tallest axmi ur da tellid
Manis tekka tesɣart nnec yujaren tiseqqar?
Mecḥar xaf s iḍefsen n ussan di temmenḍar
Am ussan n rexrif i di iweṭṭa wafar
Rami d tenḍer tallest abrid ɛad d azirar
Wedjas tudart nnec i was ur yetmenzin
Ad yemsagar useynu yeccur s tɣufawin
Ad yedduqqez d ajjaj yesfaqqa timeḍrin
Wen yeddaren di tjuras ad yarzu xef tfeswin.
