S teyyita n wul d qaɛ taycitin,
S iẓewṛan n buḥbel, triɣ cem a tifezwin
Aqa imarawen inu zeg wabbuc n tala nnem swin.
Cem d tammurt inu iteksen ticawin,
Daym ufiɣ taɣimit timim aked reɛwin.
Xafm i ɣa ariɣ min εemmars war xafm urin,
Xafm i ɣa ksiɣ amnus war xafm ksin.
Ɛad ɛemmars war ẓṛiɣ aẓṛi i xafm yarsin,
Uḥlen xafs di tarezzut, ad t afen war t ufin !
Cem d taseklut zi usment tseklutin,
Cem d tanebdut zi war yelli sin.
Daym ufiɣ tafsut iyaṛḍen tifeswin,
Daym ufiɣ rebhut zi rebhut war yellin.
Meɛlik war dayem tattut, tseyyeḥ xef tmawin !
Meɛlik war daym tayyut, tesɣumbaṛ tifawin !
Ssitmeɣ zeg ayt bab nnem:
Ad ẓẓun timexsa am cem i ɣa yilin
Ḥuma assaɣ nnem ad irqef ajenna,
Ad icuqq aɣir in.
Ayeḥḥah! Xef wi yuyuren, uca yekka ssin
Melmi mma idaren cem, isniεmil war cem yessin,
Ittu ass nnes ameggar, ad am izdeɣ timeḍlin.
