Tamurt inu d tabḥirt
War d ayi tewcid ad cceɣ,
Tamurt inu d tala
War d ayi tewcid ad sweɣ,
Tamurt inu d tirja.
Mecḥal daym urjiɣ?
War daym arriɣ mezri
Waxxa daym i gmiɣ,
Iwyeɣ daym arriɣ
Xef idurar nnem ssariɣ,
Xeyyqeɣ daym bbirheɣ
Ruɣ daym ḍṣiɣ.
Tamurt inu ma s uɣil
Akidm msafaḍeɣ,
Ad ṭṭfeɣ abrid
Ɣar urumi ad arebreɣ,
Ad arzuɣ xef weɣrum
D buheyyuf ad t ṭawgeɣ
Ad ẓwiɣ ill,
Am wejḍiḍ ad ḍweɣ
Ad sweɣ zeg iɣezran,
Xef wedfel ad ṭṭṣeɣ
Ad ssumteɣ imunas,
S utamar ad dleɣ.
Tamurt inu melmi
Ɣarm d ɣa dewleɣ?
Melmi daym ɣa ẓaṛeɣ
Tilelli tezdeɣ?.
