Iwyiɣ tt ɣar yɣzar,
Tuɣa tɣir ayi d taɛezrit
Maca tuɣa ɣars aryaz.
Tuɣa d llilt n Santyagu,
Amenni i tuɣa ixes,
Uca xesyent tfawin
Uca areqen d iqerquzen.
Di tɣemura tineggura
Sekkeɣ x idmaren nnes iṭṭsen,
Uca faqen d deɣya
Am inegmas n tirizza.
Arebbuɛ n nnawa nnes
Ittsud ayi deg umezzuɣ,
Am acnaw ijj n wzyn n telmidt
I qqetsen mraw n ixedmiyyn.
Sembra tfawt deg yxfawn
Aqqa zzaysen isekla meɣɣaren,
D ijj n tḥimart n yiṭṭan
Ttzu ɣar lagwaj deg wasif.
Arami ncuq tabɣa,
Izrafen d isennan,
Tazeṭṭa n ucewwaf nnes
Ttegga tɣuzi di tma n yɣzar.
Necc kkseɣ kurbata.
Nettat tekks arrud.
Necc taḥezzamt n rkabus.
Nettat kuz n tsedriyin.
Ra newwac d ra d wɣlal
War ɣarsen tilmect amenni terɣeɣ,
Ura d tisiten saddu tziri
Areqent amenni.
Timesḍin nnes trakkwarent ayi
Am iselman iggwden,
Azyen tecci t tmessi,
Azyen tecci t tesmeḍ.
Llilt nni uzleɣ
Di marra ibriden icnan,
Nyiɣ x tjedaḥt
Sembra iryamen niɣ inreqben.
D aryaz uca war zemmareɣ ad iniɣ,
Awalen id ayi tenna nettat.
Tfawt n usedḥi tejja yi
War suffuɣeɣ awalen.
Temles s tmeḥiccin d yjdi
D necc i tt yiwyn ɣar yɣzar.
Akid leɛwin tmenɣant
Txedmiyyin n tmenzixin.
D aryaz tuɣa akids lliɣ.
Am acnaw ij n umedyaz d ameqran.
Wciɣ as ict n teqraft
D tameqrant tulem s ulullec,
War xseɣ ad tt xseɣ
Mayenzi ɣars aryaz
Tenna yi aqqa d taɛezrit
Armani tt iwyɣ ɣar yɣzar.
