Tanfust a am marra tinfas nniḍen, amalway (leader) ittwassen di marra timewwa n teɣremt (tamdint), mani yeddar am marra imezdaɣ, zeg wami inɣiɣ ijj n utarras deg ubrid, war t ssineɣ min yeɛna, zi llṭa nni d nnec twaliɣ abandu n umalway yuli di temdint a, idwel ittwassen am yetran n tmedditin ɣar gguren imsebriden zi mxumblen iṣurifen.
War ssineɣ mayemmi war nniɣ deg akud nni i marra lɣaci nni igg itexsen amalway:
- “D nnecc i yenɣin midden nni, suyenni d nnec ig itxeṣṣa ad yili d amalway nwem, war yelli d wa!!”.
Maca war ugzuɣ i mayemmi deɣya dewleɣ ura d nnec am ismɣan nnes, kessiɣ as di txuncay, am marra imezdaɣ!!.
Ttuɣ war nniɣ deg usenti n tenfust a, nec d umalway nemsarwas am wakniwen, ntawi d di tefraz d tmijja n aya-wya nneɣ… tuɣa tnnujiweɣ ɣar marra igrawen nnes; nebla ma ad issen ḥedd, d nec i tuɣa yeqqaren marra tinfar d ilaɣan nnes i tuɣa tariɣ s ufuss inu!...
Amalway d aqubbani deg iyyar n tinneflest (magistratura), axmi nni ɣar s d ittemcetca weɣref (cceɛb; peuple) niɣ d ayt n imenɣan u d yenni yennuɣen deg imxumbal n tudart nsen… taffed amalway war yessin manis i ɣar issenta ad issefsi timukrisin a, icemmez deg imeswan nnes (moustaches), isniɛmir axmi yessen, maca war yeqqar walu, itarra xaf sen: (War yelli d wemnus, war dinni twiliɣ min xef ɣar temxeyyaqem, assefsi n umxumbel nwem ɣars uffuɣ!...).
Ikk d wezlay n imalas d min arbun n wussan, idwel umalway d amɣar u d akbab (symbole) n teɣremt, marra tarran as taynit, tettaren as tudart s uzir d yiḍ, axmi ikides tilin; teggen ixf nsen texsent s waṭṭas; ad tawalid tittawin nsen tareqriqent s imettawen n wecmat.
Amalway war iḥemmel ccum n lbaruḍ d uqarṭas d wexfif, axmi nni yessen ira dinni imenɣan issewjad ad imneɣ s isekkiyen (épée), mammec i d tuɣa tmenɣan imgranen n zic n umezruy, s uyenni igg yeṭṭef di marra min yellan d amenzu, u d suyenni igg itwala marra imenɣan am ict n turaret, war ɣar sent bu uṭṭunen (numéros), war yessin amezwaru ura d ameggaru nsent!!...
Icenga ugzun i tmukrisin n umalway di turaret n imenɣan, suyenni ikides tmenɣan s taɣara (Manière) nnes deg umcubbec, dewlen ccaten s umrig (des armes) am wenni i zi itmenɣa netta.
Triɣ ad iriwen ussan n imenɣan n umalway nneɣ iked icenga, imenɣan itekken ddaren abarru n wussan s iziren d tmedditin, mani ittmarni uɣewweɣ n lɣaci, d umsawal n isekkiyen axmi nni itqarqub uzzal nsen iked aya-wya deg waḍu n ujenna, d ilaɣan n tmijjwin nneɣ itettaren s tudart i umalway nneɣ, imgranen (guerrier) s tadusi nsen sɣuyyun axmi nni twalan idammen nsen tazlen, tmudjuɣen; starturen xef ucar n tmurta, ad teslid tcemcimen s ca n yiwalen war d asen itgzu ḥedd!!.
Tuɣa ntegg mammec i tuɣa llan imenɣan n zic, iteffeɣ d ca n umgara zeg ugraw n imerdas, iqqar s taryazt d tɣuyyitin nnes:
-Wi izemmarn ad kidi immuɣzel, ad yeffeɣ ɣar ammas n ubaraz?!.
Ammu id tuɣa nssenta amcubbec nneɣ…
Abarru n imenɣan i negga deg waṭṭas n iduɣar d imucan, maca war ssineɣ amalway nneɣ mayemmi tuɣa itexs aṭṭas n imenɣan igg ntegg deg ugensu n tnezruft (sahara), war zemmareɣ ad ttuɣ ussan nni di tuɣa ntɣima dinni nweddar i waṭṭas n wussan, deg usezɣel d tsammart n tfuyin, ar ɣa mmten iyysan nneɣ s ujeyyef n ufadi d ulaẓi?..
Radas inu i tudart n umalway yejja yi ad ssneɣ abarru n tmukrisin d timeqranin xef umeddur nnes iffaren, zzay s ura d min yeqqnen ɣar tudart n taqquyt nnes (sa vie sexuelle), ssneɣ ira tuɣa war izemmar i ca!
Di marra agensu n tqesfin n umaḍal, ixessa igelliden ad ɣar sen tili tadusi d tizemmar am ikidaren, ad zemmaren ad zzay s mercen abarru n tywin d timɣarin deg ict n tmeddit, maca amalway ɛḍarent tizemmar nnes!.
Amtawi (Accord) yeqqnen jar ayid akid s; netta ad iffeɣ ɣar texxamt nnes n yiḍes; axmi nni d ɣar yenḍer yiḍ n tmeddit, maḥend ad issemɣar zi taryazt nnes axmi nni ɣar yeṭṭes iked ca n teslit zi waṭṭas n teslatin nnes.
Llṭa di tilin marra imezdaɣ trajan uffuɣ nnes u netta yeksi jar ifassen nnes takettant, tbeqqeḍ s idammen n tuɛzariyya nsent…
Maca di tidet, wami nemsarwas nec d netta di tefraz nneɣ, d nnec i tuɣa akid sent i tettṣen, itettar zzay i ad iffeɣ di tallest n texxamt, tuɣa textuttureɣ am uzrem ɣar rectu n yiḍes nnes, maca wami tuɣa tettṣeɣ iked tislatin d tayywin nnes; tuɣa taciɣ akid sent trunt s tiqqest yarɣin d alsawen n tmessi deg wul nsent, tesliɣ deg unggaf nsent acetci itemsawal s imeṭṭawen jar tmuɣrin n tallin nsent, ameṭṭa nni immexsen remrac n uɣir!?…
Deg umeddur n umalway teffar xafi ict n tmeslayt, d taxxamt d yussin zzat i mani igg iteṭṭeṣ, taxxamt a marra ussan nettat teqqen, war yeksi ura d ijj asarraw n tewwart nnes, war yessin ura d ijj min day s i tegg, yarezzm it axmmi yessen war dinni lliɣ di teqseft, niɣ ɣar s aɣmis aqqa yi iggwjeɣ xaf s, ura d nnec tedduɣ d imewddar deg imunas n tudart inu…
Iked uzlay n wussan, d waṭṭas n umyawaz n imenɣan i ggiɣ iked umalway, nec i tuɣa war day i izemmar ura d ijj s tadusi inu ad day i yarna deg umuɣẓer inu, niɣ ad day i yeɣḍer ɣar ucar n tmurt, maca deg ijj n llṭa msagareɣ iked ijj n umgara (guerrier), itṣuḍ am uyenduz n idurar, s iɣallen nnes izemmar iɣeḍer ayi ɣar tisi n tmurt, rajiɣ ad day i ineɣ s usekki nnes, uca yenna yi s ubuṣar n wawal:
- Uhu!! War cek neqqeɣ ca, maca ad ac kkseɣ iḍewḍan n ufuss nnec afusi!.
Ssutareɣ ɣar s tudart, d suyenni war day i yenɣi ca!!.
S tiqqest n umenɣi nni; qqimeɣ abarru n wussan d nnec ttṣeɣ di tassut n umalway, war d arriɣ taynit inu i marra min imsaren dinni, deg ict n tmeddit kkareɣ d s tigwdi zeg uskuti inu, awarni wami urjiɣ ict n tarja, sriɣ day s i ticti n tsira n umalway; ɛeffsent xef tisi n teqseft, arezmeɣ tawwart, twaliɣ yudef ɣar umaḍal nnes, ɣar tiffar n texxamt nni, udffeɣ akid s ɣar dinni…
Zriɣ aṭṭas n tismaqlin, uylent xef igudar n texxamt, marra ksint timitar n umezruy n imenɣan nneɣ, dinni tiwalfin day sent nec d umalway, ict nettru day s am isegman, ict nesfarnin day s, tinniḍen n cennu (Chantez) day sent, niɣ n turar day sent am imezyanen igg itarran mezri i temẓi nsen.
Jar tilwiḥin a marra, dinni ict d tamenzult, udseɣ udem nnes; smuqleɣ day s aṭṭas; twaliɣ dinni ijj n umgara (Guerrier) tuɣa ɛlayen ad day i ikkes iḍewḍan n ufuss inu afusi, s ijj n usekki (épée) itissiq jar ufuss nnes!!.
Di tma d yusin deg umeggaru n teɣmart n texxamt, dinni uylen t tismaqlin n marra tislatin d tmeṭṭutin igg yemrec umalway, dinni ict n tisit tuyel zzat i tewwart n wuffuɣ, smuqleɣ day s maḥend ad day s xzareɣ tidet n wudem inu, maca zriɣ dinni tinni n umalway, tifraz nnes warɣent; tiddi nnes teqquḍeḍ; udem nnes yessu s icuḍaḍ n uxeyyeq, yejja tmart d tacemlalt tiriw xef idmaren nnes; yegga am ca n tesmaqalt texnunnes deg waman yarewyen, war yenni ad lami day i yessen, tuɣa taciɣ akid s yetru s tiqqest deg ugensu n wul nnes, sseqsiɣ t:
- Mayemmi…?
Ismuqqel d day i s uxeyyeq; rxezrat di war twiliɣ taqsuḥi nnes am tenni n wahli. Yenna yid:
- Aṭṭas n twaratin d nec tnuffareɣ di texxamt a, mani war day i itwili ḥedd, ssizdigeɣ day s ul inu s imeṭṭawen!!...
- I manis dekkin ixsan a?.
Wami yexzar deg iceḍraq nni n yexsan yeksi di turuṭ n ufuss ness afusi, yarred yenna yi d:
- Yina d ixsan n iḍewḍan nnec!!.
- Maca war yelli mayemmi d asen ɣar tarred taynit, min yellan itif (importance) ad tilid cek di tcuni!!.
- Maca !? ...
- War kessi s imunas, d cekk i ɣar iqqimen d aselway n teqsefta..
S tumart d usfarnen, yarred xaf i:
- A yamgara inu, yuccel xafk ad tessned aqqa rexxu nezdeɣ nec d cek deg ict n teqseft tussed deg ammas n tnezruft, tissraw s razaɣ n tzawa, ffɣent marra imezdaɣ.
- Maca !! .
- Marra min n teddar ammu; tuɣa yella d tarja n ijj n wass, niɣ d turaret i nessenta zi temzi nneɣ ɛad tuggi ad tenfarar, nec eggiɣ day s ixf inu d amalway; cek d amgara; d izem inu…
- War ugzuɣ ca i wawal nnec, maca mayemmi twaksen ammu iḍewḍan inu?.
- Wami tuɣa nella d imezyanen, n tirar nec d ccek di teqseft a, deg ict n twarat tuḍneḍ s ijj n rattan d amizi (danger); war ɣar s bu ugenfi ura d asafar, yejja iḍewḍan nnec qeṭṭwen zeg ufuss nnec, wettan ijj awarni unniḍen; am tefray n tseklutin.
- Maca !!... I mayemmi ɛad aqqa neɣ neddar di teqsefta ar ass a!?.
- Wami tuɣa neɣ d imezyanen iggwed ugellid n teɣremt zi turaret nneɣ d imenɣgan nneɣ, iggwed zi tumayt n tmacahutin nneɣ, ittɣil imenɣan nni ad effɣen d ttidet deg imal n temdint, ad ilint d amizi xaf s axmi nni ɣar nemɣar, maca inder aneɣ di ugensu n teqseft a, waxxa ccetcan niɣ run ɣar s lwacun nneɣ ḥuma war daneɣ ittejji da, s umyawaz nsen i neqqim neddar ar ass a!!.
Yeggwej umalway xef rxezrat inu, ssentiɣ twaliɣ mɣar tifraz inu di tisit nni!!.
Ffeɣeɣ zi texxamt nni, unḍeɣ xef tmewwa n teqseft, sijjeɣ zi tburjet ɣar lagwaj n tnezruft, mani yessu yejdi ijartar n usezɣel nnes; yulmen s tesfifin n izenzaren n tfuyt, smuqqleɣ dinni marra imenɣan nnegh izelyen, am ict n tidet teddar jar tallin inu, twaliɣ dinni iniɣiten (Les victimes) n imenɣan, tesliɣ i tɣuyyitin n yenni yennuryen di lwacunat nsen, tesliɣ i usḥinḥen n yeksan trabaɛen s ticeḍyin nsen deg iɛerbab n tɛejjuja n yejdi…
Deg ammas n manyenni marra, twaliɣ ijj n tallunt (des espaces) war ɣar s bu timewwa ura d iymaren, itzemma s taduṣi nnes iqesḥen am wuffar aswingem inu dinni ɣar s yarewren, deg umeggaru n weṣwaḍ inu twaliɣ ict n tseyynut n yejdi; tuddumed am wenzar, ɣelyeɣ deg wul n tḥaryaṭ nni, am waṭṭas n tuddimin n yejdi ssunt dinni ixf nsent di twangimt inu, zedɣent deg ict n tumayt n udɣar uɣa war llint tefraz am tidet.
* Yusef Ɛazz eddin d amyaru d Akurdi
