- Ruḥ, ruḥ ttar anẓar... Ruḥ isi uṛu nnec ɣar ujenna, ad taɣ ad irin ibuccren, ad aneɣ imrer ura d irem.
- Xẓar a yemma mammec teggeɣ i tazzra.
Ṣurif amezwaru, Manku imraywa yewḍa. Yekkûr ass nni i di izra ixf nnes s ijj n ufus. S ijj n ufus ura d tazzra tewɛar.
- Mani yedja wfus inu nniḍen? i d as inna i yemma s.
- Ruḥ ttar anẓar, isi uṛu nnec ɣar ujenna i d ac nniɣ a rwarrat.
Iruḥ s tazzra, mraywan as iḍaren, yewḍa.
Anẓar war yedji ca. Tafuct deg ussan a ttagi ad tari, tɣima awarni arragub, axmi tssedḥa. Ma d nettat i ɣ ad yekkaren tezdeɣ deg wjenna waha niɣ...?. Aydud tuɣa itettar mɣar anẓar, rexxu idwer issutara ura d tafuct!.
- Nuḥḥer di tutra n wenẓar ar ami i teddiq tafuct, i nnan ca n iwdan umi tuzeɣ tamijja s usutar.
- Tudart nneɣ rebda tuyer ɣar ujenna, maɣar war narezzu di tammûrt ad nettu aswaḍ ɣar ujenna ar ami i d aneɣ yaṛṛez ura d iri?. I d asen yenna Mmuḥ Manku.
‘‘Manku’’, ammu i dewren traɣan as i Mmuḥ n Bezzaḥ zeg ûmi idjef i tutra n wenẓar, zeg ûmi ijjudj i ma ad ixẓar ɣar ujenna senni d usawen, zeg ûmi issnen belli ijj n ufus zeg ifassen n uqubbu war dji d afus nnes.
Manku ihekkû mkur ass ɣar ubilaj i tuɣa yedjan d ‘‘lqecla’’ n Usebbanyu. Din, deg ijj n texxant i di tuɣa tmunen imcarben isebbunya, i ydwren rexxu ura d nettat d rqehwa n ubilaj, din waha i ytɣima weḥd s zzat i ijj n rkas n lḥayati i yeccûren s rqehwa tabarcant. Arriḥet n rkif i d itefɣen ze cqufat ireqqaɣen i yarsin x timuwwa n sbasa, ccum n jwanat i tessefsay timessi x tireqqa n ifassen, araɣi azdad n uḥenjar i yeznuzan bibba (pippa), djɣareɣ i d iteffɣen uzɣen zi timejwin n iḥcayciyyen, d zzga d tikkwra n uqamarriru.. Ɣar marra manaya i d itass Manku zi dcar nnes amen itemraywa, d manaya i dt itejjan yarexxu i tmuɣri ad tḍu s uswingem nnes ɣar imucan i itwara war iẓri. Netta war itkiyyif war idji d aḥcayci. Niɣ ad nini netta itkeyyaf s tinzar waha, war izedji jwan war itseqqiḍ ssebsi. Rqehwa nni teccûr s tayyut n ukeyyef, ad tinid rexxu rexmin ad iwwet unẓar. S uyenni min din d aḥcayci war itettar anẓar. Mayemmi i dt ɣ ad ttaren mara nitni rebda xaf sen tayyut!. Uca ad ten twarid mɣar smunan array nsen x min zi i ɣ ad yarren x iseqsiten n iwdan ibesren.
- Min d aneɣ iruḥen di min war idjin eg wfus nneɣ, min ggin inni yekkaren uyren mummu ɣar ujenna? beɛda neccin n tegg aseynu ad taɣ ad idwer d aẓar amec id aneɣ nnan di temziyda.
Deg ijj n ujedjab d abarcan umi iriwen rejbub i di ineṭṭer Manku ixf nnes uca iri isaha ad yarewweḥ ɣar taddart zegga iri tadjest tessuyes tubbarcent x min itwasewḍen d rxezrat d min itwannan d awaren. ‘‘Seḍḍam icuq Lkawit... marra regnus mɛarwanent x Lɛiraq’’ ... ‘‘Israil ɛad aqqa t tneqq deg Ifilisṭiniyyen..’’... ‘‘anẓar ɛad yugi ad iwwet da...’’. Manku inwa di tungit nnes marra min isra d awaren uca yarra rqeb n ujedjab x uzedjif nnes ad taɣ war d as isḍiw usemmiḍ akiyyef n jwan d wenni n rkif i ycemm war ikiyyef. Anict i din bulsen irumiyyen di lqecla nni i yeḍḥan d abilaj i din keyfen rexxu d rkif. Abilaj n wawar d ukeyyef d uqraɛ n mummu. Manku ɣar s ijj n ufus, wi issnen amenni id irur ura imsar as ca. Ura d ijjen war d as iẓri afus ma iqeṣṣ zi teɣruḍt niɣ zi teɣamrt n uɣir?. S uyenni i yekkar yard qubbu, maḥend ura d ijjenn war itessen. Maca ca n ijjen inna di dcar aqa iẓri dt rami yekkes qubbu awarni tahendect uca banen as d iḍewḍan d imeẓẓyanen uyren ɣar teɣmart n uɣir nnes. «Mri ɣar s iḍewḍan iri ismun iten ɣar inni n ufus nniden uca iri yisi uṛu ɣar ujena maḥend ad yettar anẓar amec i d as tenna yemma s». Ammu i d xaf s yarra ijjen nniḍen.
Anẓar walu, tafuct walu, afus walu, min ɣ ad yexdem wa?.
«Ruḥ ttar anẓar ura teqqimed di taddart» i d as d tɛawed yemma s. Nnan as inni yugin, am netta ad ttaren anẓar, zid akid neɣ tettared tamennawt i Wmarikan icuqqen Lɛiraq i icuqqen ura d netta Lkawit. Kkin d xaf s iḥudriyyen n dcar nnan as sutar akid neɣ ad narna di rurat n tcamma. Usind ɣar s ca n iwdan i war iẓri ɛemmars nnan as ttar akid neɣ ad dduqẓen udayen. Yuss d Rḥaj Largu inna s ttar akid i ad as nɣeɣ ddubli ssis deg wfus i Ḥeddu n usarxentu... Traytmass rami i dt tufa yeqqim deg ûzzray tettar zzay s akid s ittar war ttezguttuy ayenni n tyaẓiḍt i ɣar s.
Maca netta tuɣa ijjudj i ma ad yisi tiṭṭawin nnes ɣar ujenna, tuɣa ijjudj ma ad ittar ca n min war izemmar ad yegg s ufus nnes. Tutra ayenni i yhewnen, s uyenni marra tettar war yrdji am timegga, s uyenni udrusen inni i yteggen.
‘‘Lɛiraq...’’ ‘‘xẓar ɣar win min itegg...’’ ‘‘Seḍḍam n...’’ ‘‘zrid ij n jw...’’ ‘‘Lkwit...’’ ‘‘irar tcamma tesqared...’’ ‘‘ɣarneɣ tzawa, razaɣ, xẓar nɣiɣ as ddubli ssis deg wfus...’’ i nec mayemmi! ... nec mɣar d Manku.
- Jen ad tejnid di tmessi...
- Kkar ad raḥed ad xedmed a yekkar ac yirem...
Issij zi rqeb id xaf s yarra zzat ma ad xaf s yekk yiḍes, isbarquqqey tiṭṭawin, iḥḍa yemma s ma tffeɣ ma ɛad.
- Mri i d tefɣent tutra inu iri mermi i d arriɣ afus inu...
Ammu i yenna Manku ɛad i yeswa tuddimt taneggarut n reqhwa tabarcant i d as yeqqimen di rkas n laḥayati.
