Yeẓẓu aswaḍ di lebḥer ameẓẓyan i das-ittbanen am ca n
tenda(1) d tameẓẓyant teddurri adu ca n wedrar. Yeqqim-as mɣar ad igeffeḍ ḥuma
ad icuq.
X uɣezdis-nnes; asgiḥgeḥ n uḥudri d tḥudrit ttun ixf-nnsen.
D nitni i yesmeẓyen lebḥer rrin-t d tanda. Aḥudri yallah ɛad ittreẓẓa-d
iseggusa-nnes zi temẓi ɣer temɣar. Arruḍ am tsila, kulur d ijj. Yessili
ticenkukin am uyaẓiḍ. Taḥudrit-nni i kid-s ula d nettat d tameẓẓyant, ad d-tas
anict nnes niɣ yujer-itt s ca n useggas. Tcedd tamuzart ɣer deffer am unewwar n
uyis, taserwalt n djin tmarweg(2) x tfaddin axmi i x-as tt-ccin yiṭan. Tegga
ijt n txademt deg yimez. Tettban tefsus aṭṭas, wer tettrus deg yijj n wemkan.
Wer t-jjin ad iɛumm di tenda-nnes, srewyen-tt x-as. Kul
twala ili yeẓẓeryeḍ lxezrat-nnes ḥuma ad yeḍfer asgiḥgeḥ-nnsen, ad yenɣel aswaḍ-nnes
x wemqebbaḍ-nnsen d wemrubbuẓ-nnsen aya aked uya axmi wer dinn mani ɣa mbeɛɛaden.
Axmi i ten-d-tecca ttuḥsert deg wass n wenẓar. Amaḍal yemɣar aṭṭas nitni
ssekmummcen-t d amqebbaḍ jar-asen.
D ta d tayri, xmi d-tesfuffuy tetterra amaḍal d takemmict,
tetterra amdurreɛ d amaḍal ibedd jar tnayen n wulawen mradasen.
Snuryen deg-s taycit s temẓi n lebḥer. Yeḍfer asɣun n
wemsawal jar-asen ḥadar a t-sgajen ɣer taycit n tayri tamenzut, umi tuɣa ittari
tibratin ittxemmel-itent di jjib n weqrab n Feṭṭuc i xef tuɣa yecca bunarjuf i
twalat tamezwarut di tudert-nnes.
Ixezzar deg iḥudreyyen tteẓẓyen-d tayri zeg iqemmumen n
wayawya. Ixarres deg wussan n tayri-nnes i yesseɛdu d lxezrat di Feṭṭuc jar leḥyuḍ
di sekwila.
Tuɣa ittalem-itt d asfirnen yextuttlen d afaji di lweqt i di
teddurri tayri adu wafer n cciṭan. Ixarres umi tuɣa das-yessekka imez x weɛrur
n tfust ḥuma ad zeg-s d-yajju cwayt zi telɣeɣ. Umi tuɣa das-yesɣemmay aswaḍ di
tancucin ittiraren tiɣarḍin ɣer weltax n wul s taycit n tayri tamenzut. Umi tuɣa
ferrnen tixfifin n uḥenẓeẓ ireccmen isuraf-nnsen, ireccmen abeddi-nnsen di tɣemmura.
Tuɣa ttekken ḥidi ḥidi a wer ten-zzuzzaran d awal x tewririn n ugarnez.
Yeɛqeb-d zeg weɛraq-nnes, ɛad iḥudreyyen aqqa-ten ssekmummcen
amaḍal-nnsen jar-asen, maca netta tedwel tenda d lebḥer di tiṭṭawin-nnes.
Yessilleɣ aswaḍ aked ususem-nnes, d ujenna d taẓeqqa d ijt tumes cwayt n
tsegnutin, uca yezzelz taɛejjajt i kid-s d-yemmeksin zi mani tuɣa yeqqim.
Yekker ad iraḥ ad yerzu manis i d-ɣa-yettwala lebḥer d tanda.
Yeɛdu aɣirin, amen tiṭṭawin-nnes wer tent-id-yekkis zeg
wemqebbaḍ n uḥudri d tḥudrit. Nitni wer das-d-rrin taynit, wer ssinen man
tafert i di yensa. Lhan di melhu-nnsen.
Yeqqed i yijj n ugirru. Yeggur x tma n lebḥer amen iɣeṭṭel
tawlaft(3) n iḥudreyyen ittexsen ayawya x tewlaft n tmexsa-nnes tamenzut umi
yessurf twalat tamezwarut deg iyyer n arriḍa.
Yessemqudda timsarin n lexxu aked temsarin n iḍennaḍ.
Ittxarres; kulci x lweqt. Meɛlik i d-usiɣ di lweqt-a ili d necc i yemqebbaḍen
aked tḥudrit. Meɛlik netta i d-yusa di lweqt-inu ili aqqa-t lexxu ixezzer-d
deg-i yeccat leḥsab x mamek i tuɣa tayri d mamek tedwel. D lweqt i yesneddun
tayri, tettejja-tt tettbeddal arruḍ jar iḍennaḍ d wass-a.
Isiɣi yeggur. Yeḍwa-d ɣer-s ijj n uyeccul amen t-id-iḍeffer
ijj n uḥenjir d ameẓẓyan. Yeṭṭef ayeccul-nni, iraja aḥenir-nni amen deg-s
d-ixezzar s lxezrat n wi tuɣa t-yessnen uca iweḍḍer-as.
Yesfirnen ɣer-s, uca iseqsa-t: mamek dak-qqaren?
Aḥenjir-nni wer yessiwel. Yeqqim yesseqsaḥ lxezrat, yegga
afus deg uqemmum, ittraja ayeccul-nnes.
Cwayt, uca ad isel i yijj n ulaɣi s tmijja d taleqqaɣt:
Anir, yallah deɣya!
Yettebheḍ! Tnixt n wawal-nni tudef-as deg umeẓẓuɣ axmi i
das-d-tesfaq ijj n ulaɣi tuɣa yennudem di daxxel-nnes zeg wami tuɣa-t d aḥudri.
Ktar zi manaya, netta qqaren-as Anir, ɣer-s isem d ijjen netta d uḥenjir-nni.
Ad yili zeɛma x-as i d-yusa ulaɣi-ya?
Wer yuci al ami i das-yexḍef uḥenjir-nni ayeccul-nnes zeg
ufus, uca iruḥ ittazzel ɣer yemma-s. Tessekk-as afus x uzellif, uca truḥ ggur
teqqar-as: Mani truḥed a Anir inu? Terrid-d ayeccul-nnek?
Tessurf cwayt, yeqqim yesskan-as-d mmi-s ɣer wergaz-nni i
das-yerrin ayeccul. Teḍfer aḍaḍ n mmi-s s lxezrat, uca tettebheḍ umi msagarent
tiṭṭawin-nnsen. Qqimen amenni xezzren deg yijj d wenneɣni, wer zmiren ad d-ssufɣen
azul ad t-inin i wayawya. Tessadar tiṭṭawin, uca tugur aked Anir ameẓẓyan,
tejja Anir ameqqran ittɛumma deg uxarres…
Kulci x lweqt! Jar Anir Ameẓẓyan d Anir ameqqran, jar
tenfust n iḥudreyyen d tenfust n Anir d Feṭṭuc, lweqt tegga timegga-nnes, tejja
timsarin ttemxetwayent-as deg weḥsin n twengimt i yiẓḍen s uxemmem, sɣellayent
udmawen n wussan ḥuma ad d-lulent kul ijt d tambirt(4)-nnes.
------------------------------------------
(1) Aḥfur deg yeɣzar munen deg-s waman.
(2) Teqqers, tcerreg.
(3) Tateswirt
(4) Lḥala, ṭṭiset
