Aya dhar n ubarran
A yeyyar n umenɣi
Tezdeɣ day k tudart
S ibeḥrar n unuri.
D cek day i yejjin
Tariɣ s uriri
Ad ariɣ amezruy
Nnec war iɣedji
Ma tariɣ s rxaḍar
Ma tzemmeɣ s umenɣi
Ad ac iniɣ uyar d
Ra d cek ari yi
Siwer d x tidet
Deg irimamen tarwi
Ciyyar d s idammen
D ac isseswen dmani
Sriwriw d s yires
Xak yisin tarzugi.
Faḍma ɣar k tus d
S tidurin n uɣi
Tarzef d d inexsisen
Yudumen d araɣi.
Aya dhar n ubarran
Aya sendef day i
Aymar ucar nnec
S taryazt zi yefri
Faryent s yiwaren
Suya d yenni
Xebcen aneɣ udem
Di tutart war n tiri
S feḍren tiḍewḍin
Ḥuma war cek ntari
Arẓin rxezrat
S rḥezran war ntwiri.
Aya dhar ubarran
Mani cek ɣar nawi
Mani?
A cek nidar d twafit
Tweḍḍar war tnufi
A cek neɣnes d ayezzim
D asendef i yenneɣni.
Ad as iniɣ i Temsaman
Twangit war tmetti
Ad as iniɣ a wetcma
Rubiɣ, ruba akidi.
