Ttaymeɣ d axaṛṛes
zi turja war iṭṭetsen
Ad teggeɣ d trict
i wbezzeɣraru war ittnusen
Ḥuma ad arezfeɣ
ɣar tefras war yudisen
Ad zzay s ssariɣ
x iḥudaq icemsen
Ad tefsareɣ d temrer
x tcuḍad yessudjsen
Ḥuma ad wɣarɣ
i tefray zzay i yususen.
Iẓri(2) inu d aftaḥ
deg ireymam war ijarsen
Yessray deg iseqsan
itran wi zi ḥedjsen
Ma Ysḍar d d akud
n useynu yeqqarsen?
Yeqqars x wazɣat
i yimar d ittasen
Yesfuffi d d ineggi(3)
di tecri ynessisen
Yuddum d d tiɣarsi
yedwer d ixarisen
Yeffal(4) deg waddud
ssedren iḍeffisen
Inixses rami yuca
yettnufsur zeg ususem
D tifray n umezruy
ad tt nɣar ad nessen
D tamenttiwt n raggʷaj
deg iḍa ad yensem
Tuɣɣerma d aɛeffar
zi midden war nttisem
War nettɣimi d tmḍri(5)
jar tefray n yedlisen
Jar iɣarfen(6) n tudart
d ticuḍad yemmarsen
Yeffud d tisatarin
yurmen s inexsisen
Yesyiwn ayi uremmud
s turja nnes yiḍsen
Rami day i yentta
s imezran n ineɣmisen
Ittayez day i razaɣ
d fad war isessen
Sremmaden am ad tt uyurd
cem ttuɣa d imawsen
Ma ad d tared amarwas
zeg unni yemmarewsen
Ma ad iriɣ d tizneft(7) nnem
cem day i yarewsen
Tesyiwned tamexsa
i yenni cem yemmexsen
Ijj i yirem inu
umi ttuɣa djasen
Farnen as deg uxeccab
d tiyyart war yumisen
D ixf inu ufiɣ t
d arimet ittiḍiḍisen
Yemɣar day s unezdem
s unaẓi n yejrisen
isiɣ d ad armeɣ anezdem
war s ufiɣ minzi ɣensen
ma ad dewreɣ d aniyna
isfaqa imeṭsen?(8)
War tɣimiɣ d inecrawen
midden war dayi ittessen.
Amawal:
1=lqafila,
2=vision,
3=tuffet nni d itefɣen zi rḥid n wexxam,
4=neqar as yeffar tisria, iɣaynen, ifaracen, inuda ext, nec twariɣ qarent i ssinaɛa,
5=inuraz ni yetɣiman di tsirt xminni nḥarri tazwact,
6=kader, aɣarf n tsirt ij itiri sennej ijj swadday d ina umi qarn s ta3raft iṭar,
7=ṣṣifet n bnadem minzi din udem din tizneft,
8=imeṭṭes, asimi nni itiri deg wɛeddis n yemmas yetes it3eṭṭara war itrur niɣ itɣima deg wɛeddis n yemmas tmetta zzays.
){kind=link}