Carfen ayi s iseɣwan
Teggen xafi ifuray,
Teqqnen tiwwura
Jar ayi d wazzary;
Tesmexsem uř inu
Weṭṭant ayi tefray,
Kessiɣ deg ixef inu
Aṣemmiḍ iɣeṭṭer ayi;
Sɣuyyuɣ s useɣdi
Řa d ijjen ma yesřa ayi,
Tyezmem ayi s wawař
War ɣari yedji weɣyay.
Qa yus d wass nni
Tuɣa ttṛajiɣ deg wussan,
Tɣuyyit ɣar ujenna
S min dayi iteqqsen;
Ad ssuyurɣ řxezrat
Ɣar uraq war yudisen,
D ařaɣi x iẓewṛan
N tcuni, ad asen;
Waxxa ɣir d asfuffi
D řḥarac n usennan,
Ad t kkseɣ s ufus inu
Ad ɣari isfirnen zzman;
Waxxa ɣir d anessis
Xef tbadut n iɣezran,
Ad t ksiɣ xef iḍewḍan
I řizeɣ n iẓewṛan.
