Ura d netta tuɣa itirar Tinufra, aked Tarwra n Dcar nnes, umi tuɣa yedja d Amezyan,
netta yessen ad yennuffar deg Iqwaren d Txuxatin n Tudrin n Dcar nnes, war qqaren ḥuma ufin t imeddukar nnes di Tirart, tuɣa qqaren as: Tas d ad tennuffared, tas d ad textutred…
Arezzun ad asen yescen Twafit n Tnufra nnes, maca netta yesqar yesnuffar awar deg Ires nnes.
Netta tuɣa yessen Tinufra d Tirart n imezyanen xmi ɣa yemɣar ad tt yessermed i Tarwa nnes. Aked sen i tt yirar.
Tinufra Tidet tedwer, tarezzu xas Tudart nnes, Tinufra zi Tarwa n Dcar nnes, d Dcar nnes,
Tinufra x Uzreḍ izedɣen Ussan nnes,
Tinufra ura zi Tenni yexs wur nnes, umi yucar wenneɣni Amcan deg urar n Turja nnes.
Tinufra ura zi mindi yetxarres Tiqacqact nnes, war izammar ad yeffeɣ zeg Ixef nnes.
Tinufra temɣar d anawer, zeg Imucan i tuɣa yedjan nnes, d Iwdan i tuɣa aked munen idammen nnes, ura aked tenni aked yebda Ur nnes.
Tinufra tedwer d Aseqsi umi war yufi Twarit, deg Ussan Imarzuga iḥewsen Tudart nness, yerezzu ad yennufser zi Tiwecca d Imal yeqqiem deg ijjen n Was marra Tudert nnes tirar day s aked yexf nnes.
Anawer zi Tmurt yemexsen Tarwa nnes, zeg Iwdan nnes idwren d Midden.
Anawer zeg Ires iyettun Aqemum nnes, umi ksen Awar nnes.
Anawer zeg Midden iḥewsen Tammurt nnes. Yejja s Tamurt ad ays yeẓẓu min war yedjin nnes.
Netta yerezzu ad yekkes Iẓuwran, itqnen ɣar Ixef nnes, maca rebda yetɣima day s cwayt zi Refwaḥ n Ucar n Tmurt nnes. Yerezzu ad yenḍar Ixf nnes di Tudart n Midden ad yedwer d Amezruy xef war yessiwer ura d ijjen.
D wa d Arifi yeggin Tawra i Tammurt nnes, d wa iyeggin Anawer i Tmaggit nnes, d wa umi urant marra Nkawi s Yirsawen n Midden, xmi d Aydud iyettu wakuc n Tira.
Yura xaf s
Ad yemmet deg Warrud n Midden ad xaf s ɣaren s Wawal n Midden, ad yenḍer deg Ucar niɣ deg Waman Midden ….
Amnuffar yetseqsa Ixef nnes, x mermi Unawer ɣar Tidet nnes, x mermi ɣar yekkes Afray x Tudart nnes.
