Yessu tifray n udlis nnes xef waggu n iraɣan, yarcem xaf sent tasiynut, tmuddu s ibeḥrar nnes ɣar akkuc n waman, tmuttuy s uneɛqar ɣar udarreɛ n waḍu, ttemrudjuy s rebhut ssa d ssiha akd tisiynutin nneḍnit.
Di ragwaj, isenned wenzar ɣef ibuda n zmann nnes, di tqesfin n ujemmaḍin mani yeddar d amezduɣ, itɣuɣud d ɣar neɣ s ufadi.
Yessder wawal n uḥenjar nni di tiṭṭawin n tmeduketc nnes, yexs ad as yini: ¨Sru d xaf m dfuyan nnem, tejjed arrimet nnem d taɛaryant, tasinut texs ad tudum, uyak tenni d liẓar n waman aqqet ɣar m d asittem, uyak texsd ad twardid temlel nnem i tnecnacin n wenẓar, wenni cem yetrajan deg isran nnes d twasit ɣar iḥesyan n waman nnes.
Tessili abriwen nnes ɣar ujemmaḍin, tesserqa turuṭ n ufus nnes i isefḍawen n wassam, tessiriw ul nnes i ttasiɛ n ujenna ad yadef, war nuci s uxeyyeq nnes al ami d xaf neɣ d ihnunni s umezruy nneɣ d taɣruṣi, tɣarreṣ iceqfan n tuɛɛaryent nneɣ.
Zi manis d isajja wenẓar, ḍwint id aṭṭas n teḥjijjatin, d ticemlalin n wudem, am wedfel, munent as d amuḍi ɣef izerman n tenni i tenyuyren ɣar usittem nneɣ.
Telɣeɣ tessu arrimet nnes, d aɣeddu n tcuni, min yedjan nnes itmudjuɣ s mezri, isrizez d ɣar s wenẓar d asriwrew am nda issesfaden tancucin n tbenneɛmant zi min xaf s issensen n tmedditin.
Nusem marra idneɣ zeg unẓar, nusem zi tiṭṭawin nnes itareqriqen s umezruy nni nesdarɣer neccin, netta t d taslit s yeɣsan n uɣanim, d taɣenja tessemliliḥ ɣar yimal nnes ad ɣemyen uraren nneɣ d tifeswin, ttinit ɣar akkuc n waman ad yessu s tyawant nnes xef ulawen n ulaẓi.
Aḥenjar nni, itirar, ineṭṭu, am uyarziz nni yeẓrin anqar amezwaru n tfuyt nnes, itaɣedd tiḥjijjatin n wedfel ɣar turuṭ n ufuss nnes, itmuttuy zzay sent ssa ɣar uɣilin, ssiha ɣar da, itettar ad yudum d taẓyuḍi marra min yarcem n tsinutin ɣef tefray, yejjin anẓar ijeyyef deg ijenwan nnes, mani yeffud tinessisin ad udument d aman ɣef tancucin n isegman ad nɣen afadi nsen day neɣ yeffuden.
