D ict n tmeṭṭut temɣaṛ, teddar aṭṭaṣ n iseggʷusa xef tma n yeɣẓaṛ, teṭṭef deg yexf nnes s yexf nnes d tzemmar das d isqad bu yjenwan zi tewwuṛa n ujenna. tezdeɣ deg yict n taddart maṛṛa tenxaṛṛem, ixxamen nnes maṛṛa wḍan icca ten rmessus. mani mma tṣewḍed d ixemrawen. Kkint xafs aṭṭas n tfeqqaε di tudart nnes; teẓẓiḍeṛ i yṣemmiḍen d wenẓaṛ, mkul twala ad xafs yeḥmel yeɣẓaṛ war tt itiwi.
Tejja d abarru n taṛwa nnes maca min umi? am xmi war ten d tejji! maṛṛa mzellaεen, maṛṛa ttun tt qaε war dasen tecqi, jjin tt teddar d tayujilt.
War daysen bu wul nni yellan deg yewdan, mli daysen ul ili war tt tejjin ad tru ad tettar ɣar ayt bab n dcaṛ. ayt bab n dcaṛ ggin days ɣezzu, tettar ɣarsen tasekkift n waman ḥuma war tmetti s fad i teffud, ḥuma ad as wcen ad tsu deḥḥcen xafs, tmaṛḍnen xef yinni umi tezzilliz d yinni xafs iksin imunas, kkaren tfafan xafsen di dcaṛ tetten asen rmuxx qqaṛen asen: jjem tt ad temmet tenni tewsar ar ami tugi! Min umi tudart nnes? Min daneɣ tewca? uca tṛajan melmi ɣar temmet nettat tugi ad temmet.
Mkul twala ili kkin xafs ad slen ma tarra ca n tneffut ma walu, ca n twalatin ɣeṭṭṛen xafs ula d tawwaṛt wi dasen ɣa yinin lla? ttedfen ttafen tt εad teddar uca ili dewlen ad bbyen iseqsan deg wayen jar asen; minzi teddar ta? aman war das newci ca! Yak ma tasen d ɣars taṛwa nnes war ten nẓaṛ?!
Aɛmud rid deg ayt bab n dcaṛ, aεmud di min d tejja. ttun tt, ksin tt d aseḥqaṛwar das qqaṛen ɣarneɣ yemmatneɣ ad xafs nessij ad tt nẓaṛ.
Tejja ten d, tssemɣaṛten d nitni ḥaṛten xef yixef nsen uca kkin ssin. maṛṛa manaya war ssinen azal n tyemmat, itɣil asen tudart mbla tayemmat aha waha, war ssinen belli d tameεεissut, d tameqqaṛṣut, tɣima d tazyent.
Ca n taṛwa nnes iwta ten lḥal ɣar uzellif, aṛeẓmen d tiṭṭawin, faqen d zeg weɣḍaṣ n yiḍeṣ tuɣa di ɣeḍsen. amen cemmzen di tqiccat n umeṛɣiɣ nnan: mani tella yemmatneɣ?
Kkaren bedden xef uḍaṛ nsen syidden reḥnuḍ ggin iṣuṛaf imezwura uca bedden s txecfin dasen ssizzaren deg webrid.
Ruḥen wussan usin d, karren d wayyawen, mkul twala ili ikkasen d uneɣmis ameẓẓuɣ belli yemmatsen tameqqṛant εad teddar! ggin min ɣarsen d tizemmar, ḍfaṛen tabridt n ibabaten nsen war issiweḍ webrid. sseqsan xafs, arzun xafs, al ami tt ufin. umi tt ufin sḥinnben as, sqiccmen as, ssemɣaṛen zzayes… tuca s tumert nni zi εemmaṛṣ war tuci.
Ssentan mkul twala sqadan as d iṣulditen zi ɣar temkabar, tedwel tbedd xef iḍaṛen nnes, tedwel itt id cwayt n temẓi, tebda tεeddel deg yexxamen nni yewḍan. kkin d ssin ayt bab n dcaṛ, ẓṛin tt, tbehḍen! mamec das tegga ta?, Tuɣa war das iqqim walu ad targeb! rexxu tedwel teqseḥ tɛeddel deg yexxamen nnes nnit?!
Awaren i ca n wussan tcarz, teẓẓu zi min itidar yiles. maca xmi tṛaḥ ad temjar tettaf izzaren as ayt bab n dcaṛ. ufin days heddu s uya dcaṛ tuɣa ilqef it razaɣ. tufa amenni tebda ttzawar iten, ttnaqam iten, teqqaṛ asen: war lli ad teqqimem tmejjarem waha, ẓẓum ula d kenniw cwayt ḥuma ad tafem cenna mala temjarem.
Umi ufin amenni ḥaṛcen ɣars deg yict n tmeddit ɣar lwaṣṭa n llilet, kkʷtin xafs, sḍaɣṛen tt zi sin n tiṭṭawin, ḥewwsen as maṛṛa min tuɣa ɣars d tammuṛt, tedwel war tessin ayyawen nnes zeg ayt bab n dcaṛ. ayyawen nnes xafs iksen afray n tzura tuɣa di tella usin d al ɣars ad arzun xef tseqqaṛ nsen war ufin ca, ufin ḥa tzawa.
Yemmatsen tameqqṛant tedwel war ten twili. minzi ten ɣa twala? qa sḍaṛeɣren tt zi tnayen n tiṭṭawin, maca war ten tettu ca aqaten ɣars di twangimt εizzen xafs, teεqel xafsen ijj ijj. ula d nitni snen mindin, ssnen rid d nettat i yexsen, snen war ɣars ca deg ufus nnes. s uya war days smiḥen ca qqimen amenni texsen tt d buḥbel nsen, tlaɣan as: yemmatneɣ tameqqṛant.
Tessenta deg wass n 6 zi dujanbir Tenfarar deg wass n 7 zi dujanbir zeg useggʷas n (2018).
