Nembeddal deg udmawen nneɣ, cek tisid tifras inu, nec isiɣ aɛban nnec, sneɣ manis mma ɣar kkeɣ ad inin nec d cek, ad dayi jjen ad adfeɣ ɣar ixxamen nsen, ɣar ugensu nsen, nebra tinfar n usnuwji, minzi twaran ayi d ccek.
Yennas i yesmeɣ nnes:
- Zall ayi ɣar iḍaren, nec d akkuc nnec, arr ayi taynit...
Yudar ismeɣ isuḍm as tifednin, yuri d yetru, isutar ɣars ad das iwadem s izrfan nnes, ad t yejj ad yiri sadu iḍaren nnes min ɣar yek netta di tudart.
Zriɣ t iffuhhart, yarra ixf nnes d Aferɛun, ineqq iseddar, uca iqqar asen:
- Nec war tmettiɣ, waxxa mmuteɣ raxart inu ad day wem teqqim d tudart...
Jar igudar n tqesfin nnes tudart tbedd x umuzzar. Udseɣ ɣar ijjen n ismeɣ zeg imezdaɣ n teqseft, udareɣ ɣar umezuɣ nnes ad t sseqsiɣ s cawy cwayt, ḥuma war d aneɣ d itesri ca n ijjen nneɣnit ad yekssi aseqsi inu d taɣruṣi ɣar wakkuc nni, nniɣ as:
- Min yegga yesmeɣ nni umi t yarra ilesseḥ as iḍaren am uydi?
Yarr d xafi s ukemmec n tammiwin, war izemmar ad yessiwer, war izemmar ad yini ca, ufiɣ iqess as iles, yejji t bra yawal.
Nɣiɣ aseqsi nni jar imi inu, ḥuma war dayi teksen iles ura d nnec.
D ttidet mara ksen ac iles min dac ɣar yeqqimen zeg wagra nneɣnit, ad cek nɣen s cawy cwayt, ad tnedred ixf nnec s ixf nnec deg imeḍran nsen.
Ismeɣ nni yejji t ad yiri sadu iḍaren nnes, ad xafs iɛeffes mermi mma yexs, yarni yas di tesɣart n buḥbel, maca nec war dayi yessin belli bedleɣ aɛban inu s ijjen nneɣnit, iri igga yi ccerwaw ad dayi yejj d tiggaz x marra udmawen n rwacun n teqseft nnes, ḥuma ad taf war tettun tanfust inu.
Arriɣ taynit i tudart a n taggant, mani djan wuccanen ffuden tisessi n tidi n inneɣnit, mani ffuden ura d askaf n idammen.
Tekk d tayyut x tittawin inu, arezzuɣ x wufuɣ zi tewwart itawyen ɣar umedukel inu, ad das areɣ udem nnes ad dayi d yarr wenni inu, ssneɣ mara ddareɣ s wudem n midden nec mmuteɣ.
Ufiɣ ufuɣ, usiɣ d ɣars, yarra yi d agra inu, maca jjiɣ ad yi d yarr x useqsi nni ɣari yeqqimen yuyer.
- Min yegga yesmeɣ nni din zriɣ ilesseḥ iḍaren n wenni?
Inna yi d:
Wenni d nnec, yarḍer ayi d buḥber zi tudart nnes, maca yexs war teddareɣ d nnec mammec djiɣ, ufiɣ ad ɣufiɣ mara war djiɣ d nnec.
