Tfuct tɣri. Nqqim aɣzdis x uɣzdis x tbadut, awarni taddart nnɣ. X arragub, acmmuḍ nni ttejja tfuct awarnas ixssi, ils iḍfar wnniḍn. Zg wzwraraɣ ɣar uwarɣi, ajenna issnta itziyziw. Tirart n tfawt d tallst tticc i yzɣran ca n tfras nniḍn ur djint am tinni n wass. Tweṭṭa d ict n tffrawt[1] sneyfan ɣars wurawn n iwdan d imddaren: ur ttsrid awar ura d asbɛɛi ura tazut ura d asjiwjw.
Aɣzdis xf uɣzdis, nssusem: nc d ymma ur tmsiwiḍ s wawar. Iḍwḍan nns ɣeṭṭrn tidmamin n ttsbiḥ, ict tḍffar tnniḍen. Udm nns ynnirsen[2] tmsḍfarnt xafs tfras n tmulli[3]. Ssneɣ is ur kidi tdji – aqqat mani nniḍn, akid ca n iwdan nniḍen, ur ten ssinɣ nc. Tteg akidsn awar ad msagren ɣar uɣlluy, x tbadut n awarni taddart. Xmi ɣad isala umsawaḍ, ad tbedd, ad ay ttini: «kker ammi ad nadf ɣar babac».
Iwdan a n uɣlluy, ur d ttisn lbda: ict n twara tenna yi: «tiṭṭawin inu ddakkwalnt id urant!».
Mani ttaf anict uya n tffrawt ɣar uɣlluy?! s wass ur xafs tḥarrted: ad tinid days ayraw n tmɣarin! ur tssined aqqat jar txswin, tḍeffi niɣ tteẓẓi; ura g iyyer ttekks d armu i tfunast niɣ tmjjer imarmez; ur tssined aqqat di tɣarɣart tdarrez tabiṣart niɣ tssray imarmez; ura tqqim ɣar tsirt, tḥarri imarmez – ca d iwzan, ca d taneɣda: ad yttecc, g wass nni di ymjer, d afrfur, d aryun, d zembu niɣ d taẓmmit!; ur ttessned aqqat ɣar ifllusn d ifruryn iḍnnat, tteṭṭf ten ijjn ijjn, tssekka ten zi tiṭ n ulgzim («zi tiṭṭawin n iwdan», tenna yi umi tsseqsiɣ: maymi sn ttgged amnni a ymma?); ur ttssined tarbu aqbuc, teṭṭef abrid n tara tazggwaɣt, ad taym aman n tissi; ura tessars d taḍuft, tqqim ad tqarḍec; ura tssekka taseṭṭa x isuray n taddart, niɣ ttari d zi taddart n lalla Tlaytmas zegga xafs tssij, tegga s mayn ɣad tecc, tsrir as iḥrucn nns, tssird as, teqqn as, tssufɣ t d ad tqqim di tiri, adu tsriɣwa; ur tssined…
Xmi ttɣima x tbadut ɣar uɣlluy, di tectut di tteffɣ Tmurt zi tfawt ḥama ad tadef di tallest, di fssynt twilawin[4], ddakkwalnt d iɛrbab, di ssusumn imddaren, tbeddaln iwdan, ddakkwalen d nitni-ur-djin d nitni, aswingm iddakkwal d tirja – rxdnni, mala tẓri t, ad tinid ur tdji d tenni d amettuḍt nni tuɣa ur itiwḍen ad tecmez azdjif nnes: tarsa, udm nns isfḍ, tffɣ t tzweɣ nni n wmarri d tamara n wass; iḍuwḍan nns sqiccimen i tedmamin n ttsbiḥ; tiṭṭawin nns ẓwant, jmmḍent: twarant mayn ur twiriɣ. Wi ttwara? Ur ssineɣ!.
Udm nns iddakkwar d tisit, tmsḍfarent xafs tifras n yinni ttwara.
Wi kid ttemsawaḍ ymma gw ɣimi nnes n uɣlluy?!.
Amenni kuy aɣlluy: nettat twara, nec twariɣ t ttwara. Ar as srɣ ttini: «kker a mmi ad nadef ɣar babac, issudjs uya!».
Tizmilin:
[1] Le calme
[2] Serein
[3] Tendresse
[4] Les formes
