Teqdem, teqdem amen yeqdem bab nnes. Ad temmars di rmargeḥ nnes, tɛuqq d zzect d imerwan axmi dayes uxsas. Ad yadef Meɛnan sadu nnes itzawar s tesbanyut, yesneqcu dayes “Ah! ah! mana uqezdar a!!! Anict min ttet n liṣans i ttet n zzect “
Ijj ubuhari yebbuẓẓer qibar nnes x yijj uqaṛṭun n nnibira[2] d ameqṛan iḍeḥḥec yeqqaṛ as i Meɛnan “Asbanyu war d awem d yessek harrama a ar ami i zzayes yeqḍeɛ rayas x idurar n Madrar[3]. Cek ɛad tarezzud ad zzayes tessewqed iwdan, ad ten tarewḥeḍ “
Ad yessusef Meɛnan zzect id as d yewḍan deg qemmum sadu balinsayana nni, ad dayes d yexzar s uɣezdis uca inna s “Sulusyun[4] aqa yeksi ac amerɣiɣ, maca ma tesned wic ɣa yenɣen niɣ lla?”
Yeksi ubuhari di tdeḥḥact uca inna s “Wah sneɣ. D cek id ayi ɣa yenɣen. Maca aqa ggureɣ ad qḍiɣ sulusyun n dunct cek ɛad tjadjid dayi “
Ad d tennarẓem tewwart uca ad ggen iwdan tizizwa. Ttemḥizwaren x tewwart. War ttesrid mɣar i wawar aɛeffan. Amcum aqqa t aked rwacun nnes. Abuhari nni iḍeḥḥec xasen yeqqar asen “Aqqa sneɣ mayemmi ttemḥizwarem ad tadfem deɣya. ḥuma war tɣimim x tjarrat, yak? Ɣar cway cway xawem aqqa ad teqqimem, ad teqqimem x tjarrat. Aqqa balinsyana amen tekmer maṛṛa d tajarrat. Manimma teqqimem, d tajarrat.
Ḥuma ad twariɣ maṛṛa min itemsaran di balinsyana n Meɛnan, ruḥeɣ qqimeɣ ɣa deffar qaɛ. Ssenni id twariɣ Meɛnan awarni bulanti n balinsyana, ɣares imejjan d imeqṛanen, iḍehhar d am micki muis. Meɛnan yessawar aṭṭas n irsawen. Tuɣa t d aɛeskari ɣar ufransis. War yejji mani war yewti aqaṛṭaṣ. Ibda deg uṭalyan, yuyur ɣar L-indu-cin[5], yeɛdu ɣar Vyitnam, ikemmer as di Kungu. Ɣar uneggar war ssineɣ min yexdem yarewweḥ d s reḥfa. Iṣur di balinsyana a uca aqqa yeffar dayes imejjan.
Twariɣ ijj uwessar ɣars aqemmum axmi dayes tedduqqeẓ rbumba. Yegga am rxarbet, yesriddiy, isserseq ijj n tḥarmuct tameẓyant aked rkursi, yeqqar as “Amcum a n rkar cḥar yeḥṣaṛ !! “ Meɛnan yeẓra it uca iraɣa t id s tesbanyut “Uhyi, syintati hubmri, sin barwinṣṣa[6]“
Iṣar uwessar nni yeqqim, axmi ɛemmars war din ttuɣi rḥeṣṛan nni id as yenna i tḥarmuct nni. Cwayt ttwariɣ Meɛnan yejbed ijj n ddebbuz sadu rkursi yizzif x yijj tuɣa yexs ad yadef ɣar rkar. Ttwariɣ Meɛnan yeksi akides s tefransist “ salubard, Vuleur !!![7] Tkemred di ssuq n tukkarḍa, tusa id ad tacared di balinsyana !!”
Ijj n temɣart anict n tewrart, war ssineɣ mecḥar id tarbu n trabandu[8]. Tedwer maṛṛa d sserɛet. Ḍehharent as d ɣar tissira, d ifassen d uzedjif. Tbed ɣar tewwart n balinsyana tessawar aked ijj umxazni. Yexzar dayes Meɛnan, yexzar di tissit ma maṛṛa iwdan qqimen uca yenna s “Iwa a zzin !!! ma ansewweq ca nhara, niɣ da i ɣa neqqim “?
Turi d tmeṭṭut nni ɣar balinsyana, war tenni ar ami id tekka zi tewwart. Tzawar amxazni nni “Ama yennayi awid ijj n aṛebɛin duṛu niɣ ad raɣiɣ i xurru, yarri unuri incaɛellah”
Yeḍḥec Meɛnan, yejbed ijj n temceḍt uca ibda imecced ca iẓuṭṭan zayden as x garrat i yegga qaɛ. Yenna s “hiya nhara ddewred maṛṛa d marlburu[9] !!!” tenna s nettat lla d winstun[10]“
Teqqim d zzati Meɛnan. Meɛnan yerrankar balinsyana. Abuhari di baṛṛa yeqqen x wanzaren s arriḥet n ddexxan d imerwan. Yarra s Meɛnan azedjif i balinsyana nni ɣar uɛarwi. Yekkes d tamceḍt nni ɛawed, iḍṛeq i bulanti[11] uca ibda imecceḍ. Balinsyana tirar deg ubrid. Ibda icemmez deg uɛrur war itiwed uca yenna s i tmeṭṭut nni “ta kkar cemzayi cwayt deg uɛrur a wabba inu, aqqa war ttiwḍeɣ “
Tameṭṭut nni tmeyyer aked balinsyana “A cebbaṛ di bulanti a muncif aqqa mara tqerbed ttet zzayneɣḍ truḥ ayi sserɛetḍ aqqa nhara d nhar nnec”
Yarred ifassen ɣa bulanti, yexzar dayes, yeḍḥec uca yenna s “Ad tenneqreb balinsyana!!? Ɛzizim Meɛnan iḍaweɛ aqamyun n rɛeskar aṛebɛin sna di ṭuḍu lmundu[12], rextu ad am yeqreb barwiṭa a !!”
Iqarreb Meɛnan ad yaweḍ ɣar rqendaṛt n mimun n cciṭan ɣar tnimart uca twariɣ agrisur yeggur x sḥab sserɛet iyarru d arrecwet i ddiwana. Tameṭṭut nni txezzar zi zzaj n dat n balinsyana, tɛeqqer ddiwana nni“Ma d Buzid i din niɣ ? a wellah ma ad iẓaṛ frank ... Iḍennaḍ ɛad i dayi yekkes taziyyat n djhuni warkar. Wellah ma ad iẓaṛ frank nhara. xas i ɣa xedmeɣ waha niɣ, kabṛun[13] !!! “
Ibed Meɛnan x tma n webrid, ixzar ɣar tmeṭṭut nni uca yenna s “Tugid ad dehned Buzid, tugid ad ayi tcemzed. Iwa ddar rextu ad cemzen i yemmam jar iḍaṛen.”
Tendeq d tmeṭṭut nni amen das tteg i ugrisur tmenyat deg fus “A yemma temmut a muncif, menɛen tett yeẓra nnes aqqa ad kkareɣ ac marɣeɣ “
Yeḍḥec Meɛnan “aḥeqqa wah ista mwirṭa, bubri sitta, birda!!![14]”
Yengez d ugrisur di balinsyana uca yenna s i Meɛnan “adi lanti xifi !![15]”
Yarrankar Meɛnan balinsyana nni, weddaren ddiwana nni di ddexan d imerwan d ibarcanen. Netta qaɛ war d asen d yarri rexbar. Idṛeq ijj n sinta[16] n Farid l-aṭrac, kurma yenna Farid “illih ya lamuna” ad ixzar ɣar tmeṭṭut nni ad iɛawed i wawar n Farid “lamuna”
Iruḥ aked ddisku[17] netta d ugrisur nnes ar ami uḥreɣ traɣiɣ ad ibed ɣa lqecla ad ddaṛeɣ maca netta war kidi yerhi.
Kkareɣ beddeɣ seffareɣ ar ami I sḍuhcareɣ maṛṛa wi din ttuɣa di balinsyana ɛad id ifaq Meɛnan zi tirja nnes. Yexzar d di tisit uca inna yi “Iwa iri teddaṛed ɣar ddiwana waha a yafareṭṭu a. Ma ntirar danita bisu[18] niɣ. mkur ma nengez ijj n twara itxessa anbara[19] “
Arezmeɣ tawwart ad ddaṛeɣ. Ceyyareɣ as uca yenna id “Aṭṭa lwigu xubin“[20] !!!
----------------------------
[1] D isem n lkar
[2] ثلاجة
[3] مدريد
[4] لصقة تستعمل للتخدير
[5] الهند الصينية
[6] Ser, qim a yatarras, a wenni war itsedḥin
[7] Salopard, voleur ~ aydi uceffar
[8] contrebande
[9] Marlboro
[10] Winston
[11] Volant المقود
[12] عبر العالم كله
[13] enfoiré
[14] إنها ميتة مسكينة، حقا
[15] إنطلق يا قائد
[16] شريط موسيقي
[17] أغنية
[18] لعبة أطفال
[19] نقف
[20] إلى اللقاء يا فتى
