Adlis a d ijj n wbrid ifli d (2) ussan d iseggusa. Yarezzu ad immarni di tsekla tamaziɣt. Marra tessen amaru nnes id itmanen deg waṭṭaṣ n wyrawn n imedyazn. Marra teqqas zi tcuni n yzlan nnes deg iɣennijn. Marra ttseqsa: «Melmi i ɣa nɣar adlis n Lyanduzi?»
Fitu d wa d azwl (3) n wammud (4) amzwaru n wzrawi nneɣ.
Tiqessisin n Lyanduzi d tizirarin, minzi ksint ca n iseqsan d isemlal (5). Izlan n Lyanduzi srusan ijj n uxarres yulleɣ, mani imeɣra ttafen ixf nnsen: jar tamara n wussan d tayri n turja. Amaru isrusa d rxezrat nnes iqqnen ɣar ymxumbal n Umaziɣ n Arrif, niɣ n marra Tamazɣa.
Ini (6) n tqessisin itmun jar unaruz d unuri. S wawal nniḍen, amaru ikessi ameɣri ɣar yijj n umaḍal icna mani s sin (7) itsen ttafen maṛṛa min xef arezzun n tcuni; ca n twalatin nniḍen ikessi t ɣar ca n tmura ccurent s tallest d tarẓugi. Awarn i ca n yzlan itman d wzarwi yarezzu xef tlelli, yarezzu xef tfulmanit (8). Tira ya umsent taɣufi n wfgan yarezzun xef tlelli nnes, ittettar zi marra iwdan ad munen, ad myawazn jar asn, huma ad afn tilelli nnsen iwddarn.
Ameɣri itaf ɛawd izlan n Lyanduzi teffarn izumal (9). huma ad nawḍ ad tn nefsi, neddakkʷl ɣar umaru iturjan tamaziɣt bla afray. Isufar (10) n tira ya, nitni d tidt, d anaruz, d amnus…
Taycit teccur tira n Fitu, ttman d d iɣezdisa d initen d iferḍisen (11) di marra min d anɣ d yunnḍen. Agama (12) ttman d deg wawaln n wzrawi: itejja iferḍisen n ugama ssawaln akids, sscanen as tidt n tudart. (Afar).
Alaɣi i itcuqan izlan d ijj n ulaɣi isegged, yizdig, nzemmar ad t ntwala: war days bu tnemgalin (13). Alaɣi n wdwal ɣar iẓuran, ɣar tmurt, ɣar tudart, ɣar tcuni, ɣar uxarres, ɣar marra min iteggen Amaziɣ d Amaziɣ.
Tuska (14) n tqessist n Lyanduzi ttmarsa xef tseddast (15) n twinas (16) d ticniwin: amyag (17) iḍfar ameggay (18), yarni xafsen ca n wawaln cnan. Amarsi a ittman d asnay (19) d ijjen jar tiseddarin (20).
Ameɣri itaf ixf nnes deg wḍris (21): amaru issawal akids amn war itbeddi. Tira ya d tiqqad n unezgum (22) i war itgenfin, d acemmmuḍ n tira, d acemmuḍ n iseqsan, d acemmuḍ n tudart.
Deg umeggar, tiqessisin a tettarent zeg Imaziɣen ad tent ɣarn, ad tent ẓẓun deg wulawn nnsen, war tent ttejjin ca d tiyujilin teddarent di tattut…
Tizmilin:
(1) - Abdelhamied Elyandouzi, Fitu. Asegged n tira: H. Banhakeia, Elhossein Farhad d A. Zizaoui. Éd. Alanouar Almagharibiya, Oujda, 2011.
(2) - Icuq d
(3) - Titre
(4) - Recueil
(5) - Complexe
(6) - Couleur
(7) - Deux
(8) - Autonomie
(9) - Symboles
(10) - Ingrédients
(11) - Unités
(12) - Nature
(13) - Oppositions
(14) - Structure
(15) - Syntaxe
(16) - Phrases
(17) - Verbe
(18) - Sujet
(19) - Construction
(20) - Strophes
(21) - Texte
(22) - Inquiétude/ Amnus
){kind=link}